ALGAR, Ricardo

(1960)

 

Algar ye anagrama y alcuñu lliterariu del autor Ricardo Álvarez García, que —según informa Celso Peyroux— nació en Berrueñu (Teberga) el 9 de mayu de 1960. Depués de Teberga siguió los sos estudios n’Uviéu onde diba cursar tamién los de Maxisteriu.

    Collaborador  d’abondes revistes y periódicos, como El Cuélebre literario, Asturies Dixebrá, Riscar, Asturias Diario, El Comercio... publica tantu n’asturiano como en castellano. Quedó finalista del Premiu Teodoro Cuesta de cuentos y segundu premiu de la IV Andecha de la Poesía en Bable col poemariu Collecha de silencios y otros tremores d’espluma.

    Una interesante amuesa de la so producción poética billingüe recuéyese nel llibru que Celso Peyroux dedica a los escritores teberganos (Sombra del camino, Teberga, Ayuntamientu, 1990).

   La poesía d’Algar ye, a xuiciu de José Luis Campal, “sustantiva, non codificada n’aparentes vetes cultistes; poesía manferida de continxentes modernistes, con gustu pola polimetría y los paralelismos enraigonaos nel ambiente rural”. Na obra de Ricardo Algar esiste, según el mesmu críticu “una poetización del ‘yo’ compartíu nun decursu nel que l’exe principal nun s’abeya con temes paralelos. Xunto al amor comu trebolgante esmolición, nun falten reflesiones al rodiu de la mesma criyación lliteraria : la escritura comu exerciciu d’identidá”.

 

 

 

 

BIBLIOGRAFÍA

 

Creación

 

Voces poéticas / Ricardo Algar... [et al. ] ; ilustraciones de F. Gil Tovar]. — Barcelona : Seuba, 1991. — 63 p. : il. ; 20 cm. — (El juglar y la Luna ; 1)

ISBN 84-86747-36-8

 

 

 

Bibliografía

 

Xosé Lluis Campal, “Quince años de poesía espardida (1980-1904) o los poetes ensin llibru”. En: Lletres Asturianes, 58, 1996.

 

Celso Peyroux, “Ricardo Algar”, en: Sombra del camino, Teverga, Ayuntamientu, 1990, pp. 20–25.

 

 

 

 

 

ANTOLOXÍA

 

 

     ORIELLES DE LA NUECHE

 

    Siempre aguardamos que la nueche, aseláu antoxu

de verticales señaldaes, fienda les redes

que xuncen los cadexos de la lluna.

Pasión qu’ambura los pergaminos endolcaos

nel perllargu itinerariu de la dulda.

 

    Y entós, allugaos nun espaciu inciertu

cuando siente’l corazón un amor diferente,

un bálsamu qu’invierte, trupa la distancia,

l’espeyu la tristura.

 

    Un canciu de milenta orfeones

sobornando’l silenciu los tos güeyos.

 

    La risa ye troféu de los páxaros

de magar que los pensamientos tán piesllaos

nuna borbuya d’aire.

 

    Nes tos manes enllenes de misteriu

un báramu de pexes callandín se pierde.

 

                               (de Sombra del camino)