ALÍAS, Florina

(1921?-1999)

Nació Florina Alías en Colloto y vivió en Mieres, Uviéu y Xixón, onde morrió el 30 d'Agostu de 1999, tres d'una llarga enfermedá. Escritora billingüe, estrenóse publicando allá pelos años cincuenta nes páxines de los periódicos rexonales. Más tarde ganó munchos premios poéticos, tanto n’asturiano como en castellano: la I Andecha de los Amigos del Bable y, bastante más p’alantre, en 1980, algamó’l II Concursu de Cuentos del Centru Asturianu de Madrid col relatu Señaldaes del Sueve asina comu’l primer premiu sobre poesía marinera convocáu pola Liga Naval Española.

Formó con Luis Aurelio Álvarez un matrimoniu asturianista exemplar. Xuntos escribieron y firmaron Xente de casa : Cien asturianos de hoy (1974). Un llibru de semeyes lliteraries fechu en sonetos que ye, yá dende’l títulu, un siguimientu y homenaxe al fabricianu Munchu güeyu con la xente de casa.

Nos testos de Florina Alías alienda una Asturies idealizada pero viva, contiada siempre nuna llingua clara, llimpia y natural, espeyu onde diba tar mui bien que se miraren los escritores mozos d’anguañu.

BIBLIOGRAFÍA

Creación

Álvarez, Luis Aurelio

Xente de casa : Cien asturianos de hoy / Luis Aurelio Alvarez y Florina Alías ; prólogo, Emilio Alarcos Llorach; epílogo, Francisco Aguilar y Paz. . — Oviedo : [s.n.], 1974 (Ensidesa). – 215 p. : grab. ; 24 cm

ISBN 84-500-1154-X

Rioja, Eugenio de, Seud. de Eugenio Martínez Pérez

El regreso / de Eugenio de Rioja ; Señaldaes del Sueve / de Florina Alias Rodríguez.... – [S.l.] : ALSA, D.L. 1980. – 41 p. ; 17 cm

ISBN 84-300-3672-5

Alías Rodríguez, Florina

A la sombra del carbayón: (Guía poética de Oviedo) / Florina Alías ; dibujos de Gaspar Meana]. — Gijón : Libros de la Luna Llena, 1995. — 113 p. : il. ; 24 cm.

ISBN 84-605-2738-7

Alías Rodríguez, Florina

Gijón y el mar en el recuerdo / Florina Alías ; prólogo de Francisco Carantoña ; epílogo de Pedro de Silva Cienfuegos-Jovellanos. — Gijón : [L'autora], 1997. — 111 p. : il. col. ; 22 cm.

ISBN 84-923155-0-4

Bibliografía

Antón García, “Florina Alías”, en Lliteratura asturiana nel tiempu, Uviéu, Conseyería d’Educación, Cultura, Deportes y Xuventú, 1994, p. 154.

ANTOLOXÍA

XUANÍN DE MIERES

Canta Xuanín, y callen los xilgueros,

les calandries, los mirlos, los pinzones,

los malvises, los tordos, los gurriones

y les críes qu’esplumen pelos ñeros...

Canta Xuanín, y callen los regueros,

y non mermura l’aire sos pregones,

y non toquen al rezu d’oraciones,

per oyelu cantar, los campaneros.

Él ye la voz del agua de les fontes,

y ye la voz del árbol pelos montes,

y ye la voz del mar, bravíu o en calma...

Canta Xuanín, y la tierrina entera

ye música en so voz recia y melguera,

dexando en plasmu’l corazón y l’alma.

(de Xente de casa)