ALVAREZ
GARCÍA, Lourdes
(1961)
Nacida en 1961 na Güeria d’Urbiés y llicenciada
en Filoloxía Hispánica pola Universidá d’Uviéu, anicióse Lourdes Álvarez García
na lliteratura en revistes como Cuélebre
Literario, Malku, Adréi o Lletres
asturianes. Ta incluyía en toles antoloxíes poétiques d’estos últimos
años: Xosé Bolado, Antoloxía poética del Resurdimientu; Ricardo Labra, Muestra corregida y aumentada de la poesía
en Asturias; José Ángel Cilleruelo, Nórdica;
y Leopoldo Sánchez Torre, Les muyeres y
los díes de la poesía asturiana contemporánea.
Ye
autora Lourdes Álvarez de cuatro llibros de poesía. Aldabes del olvidu (l991), Cálices
de la nueche (1992), Mares d’añil
(Ganador ex aequo del Premiu de
Poesía Teodoro Cuesta 1992) y Poesía
escoyida. 1985-1997 (1997). Ye Lourdes Álvarez una poeta de voz singular;
al pesar d’empezar a estampar dellos de los sos primeros poemes na revista Adréi, xunta Berta Piñan, Xuan Bello,
Antón García y otros autores del grupu poéticu que lleva’l nome d’esa
publicación, la escritora d'Urbiés tien poco en común cola obra d’esos poetes.
Si estos apuesten por una poética realista, entroncada coles corrientes que nel
restu del estáu se van a conocer colos alcuños de poesía de la esperiencia o
poesía figurativa, Lourdes Álvarez, partiendo d’una evocación de la realidá y
la esperiencia vivíes, va dir decantándose por una poética de calter
simbolista, rica n’imáxenes abstractes y surreales y d’una fechura más complexa
que la de los poetes del grupu Adréi.
D’avezu na so obra hai una relación d’una subxetividá casi íntima ente
llinguaxe y emoción estética; l’idioma nos sos versos forma parte inseparable
de la esperiencia evocada pol personaxe poéticu. Una esperiencia qu’alcuando
algama calter oníricu. Na poética qu’escribe n’antoloxía
de Leopoldo Sánchez Torre Les muyeres y los díes, afirma esta autora: “la poesía (ye), en mio
entender, la configuración d’un mundu que por más que se separte de la realidá,
intervién nel so orde, texe pente los espacios ermos d’elli el cambeu de la so
naturaleza racional pola onírica y vuelve a codificar el nuevu orde mediante’l
poder máxicu de les pallabres”.
Como
traductora, ye autora de la versión al asturiano de la narración infantil Otto ye un rinoceronte, d’O.L.
Kirkegaard y del llibru de relatos Un
sudaca na corte, de Daniel Moyano.
BIBLIOGRAFÍA
Creación
Álvarez García, Lourdes
Aldabes del olvidu / Lourdes Alvarez. – Uviéu
: Alvízoras Llibros, 1990. – 45 p. ; 21 cm. – (Poesía ; 8)
ISBN 84-86889-15-4
Álvarez García, Lourdes
Cálices de la nueche / Lourdes Álvarez ;
edición, Ángel Caffarena. — Málaga : Librería Anticuaria El Guadalhorce, 1992.
– 16 p. ; 18 cm. — (Sinera ; 25)
DL MA 371-1992
Álvarez García, Lourdes
Mares d’añil / Lourdes Álvarez García. — Mieres
: Casa Municipal Teodoro Cuesta, 1993. — 59 p. ; 22 cm. – (Teodoro Cuesta ; 7)
ISBN 84-606-1203-1
Álvarez García, Lourdes
Dexar piadosamente qu'escureza / Lourdes G. Álvarez
. — Xixón : Atenéu Obreru de Xixón, 1997. — 20 p. ; 21 cm. -- (Papelyna ; 21)
Álvarez García, Lourdes
Poesía escoyida : (1985-1997) / Lourdes Álvarez
García. -- Xixón : Atenéu Obreru de Xixón, 1997. -- 83 p. ; 21 cm. -- (Tiempu
de cristal ; 2)
ISBN 84-87958-28-1
Traducción
Kirkegaard, Ole Lund
Otto ye un rinoceronte / Ole Lund Kirkegaard ;
traducción de Lourdes Álvarez. — Madrid : Alfaguara, 1990. — 100 p. 19 cm.
—(Xuvenil Alfaguara ; 1)
ISBN 84–204–5564–4
Moyano, Daniel
Un sudaca na corte : y otros relatos / Daniel Moyano;
traducción de Lourdes Álvarez ; introducción de Virginia Gil Amate. — Xixón :
llibros del Pexe, 1993. — 88 p. ; 21 cm. — (Puzzle ; 20)
ISBN 84-87259-52-9
Bibliografía
“Álvarez García, Lourdes”, en: Gran Enciclopedia Asturiana, T. XIX,
Xixón, Silverio Cañada, 1996, p. 22.
Bolado, Xosé (ed.), Antoloxía poética del Resurdimientu, Xixón, Ateneo Obrero, 1989.
Xosé Bolado, “Una llectura inxenua de la nuesa
cabera poesía”, en: Primeres xornaes de
lliteratura: Ponencies, Xixón, Fundación Municipal de Cultura, 1991.
José Ángel Cilleruelo (ed.), Nórdica, Xixón, Llibros del Pexe, 1994.
José Luis García Martín, “Breve muestra de la
poesía bable”, en: Los Cuadernos del
Norte, 45–46, pp. 170–174.
Berta Piñán, “La poesía asturiana”, en: Lliteratura asturiana y futuru Uviéu,
Conseyería d’Educación, pp. 15–26.
Labra, Ricardo (ed.), Muestra corregida y aumentada de la poesía en Asturias, Oviedo,
Consejería de Educación, 1989.
Leopoldo Sánchez Torre (ed.), Les muyeres y los díes de la poesía
asturiana contemporánea, Mieres, Editora del Norte, 1995
ANTOLOXÍA
PER MAYU
Díes amburaos de murnia: llárimes:
agua de mayu espolletá’n tos güeyos.
Tamién vi díes de lluna
llambiendo la to casa, ciega de to solombra,
y alboraes na playa.
Güei cueyo, al tapecer, llárimes,
l’amor amburáu, separanza de mayu. Y torno
a llee–y El Principín al neñu arremelláu que ná
entruga.
Lloñe suaño tos llabios y él dibuxa
un platu–planeta de ferrume;
foi un díi namás, nel mes de mayu.
ORIELLES D’OTRES NUECHES NESTA NUECHE
Faígome vieyu, escaezo nos caminos
la semeya del Valle; xuego
colos tos xuegos tremaos
n’otru tiempu, naquellos díes
onde yeres la Xana prometida
del Paraísu míu, güei viaxante
de la Ná.
Otros enfotos allumen el maxín,
nin los besos del agua
nin les lluces que faigo coles manes,
nin el ríu de mio infancia, puen escosar
les coraes del guah.e que te vio, colos güeyos
xiblando a orielles d’otra nueche cabera.
Y la lluna, nesta nueche, media la solombra
de los tos brazos.
Orielles de tristura semen mios llabios dolíos;
orielles d’otres nueches urxen nes alcordanzes.
(Lletres
asturianes, 20, mayu 1986)
VIAXERU DE LA NUECHE
"Pente
lo escaecío sorten retalinos
tremorosos
d’aquellos otros díes."
Nos tapeceres prietos, delles vegaes,
ñúblense los mios güeyos al atopar na tarde
les llombes, enantes xorrecíes, murnies de
felechos roxos.
El traxín de la xente que va y vien selemente
mengua. Delles lluces rellumen nel pobláu al son
mariellu
de la seronda parda. Anque los páxaros fuxeren
cuantayá
dalgún gurrión cueye migayes con traza de
miseries.
Dalgún guah.e qu’enrieda entreteníu, al glayíu
de so pá, torna pa casa.
Escaezo quien soi pente solombres vieyes,
l’orbayu surte nel coral pente esti día que
muerre
ayenu y doloríu, escosu del branu y de la
Hestoria.
(Lletres asturianes, nº 24, mayu 1987)
SOLES LA MAR Y YO
I
Si yo fuere un humeru, talamente,
el sol de primavera nun sería
un tronzaor que franciera la mio infancia.
Si yo fuere un humeru, talamente,
l’agua d’abril sería
un estrechu camín medrando nos domingos.
II
Ámovos pallabres xiblu que me peslláis los
llabios,
pallabres sin dicir que’n delles vegaes asomáis
a los güeyos
y en madexes d’agua espardéis la murnia y
l’orpín,
y el collor allunáu enceso’n toles nueches.
Ámovos entós, a la escontra’l silenciu, dientru
de mí
—manacial prietu de prietu xorrecer y rabia—
porque sois tolos soles que me faen falta ver
curiando de les tardes.
Pallabres ñidies de la mio raza,
rellumos marxinales qu’arrecoyéis mio voz
nel frío de los iviernos, pallabres ensin dicir,
pallabres saborgaes na mio llingua: Ámovos.
III
De ná te sirvió, agora que la mar y tú táis tan
soles,
amparar el mio cuerpu desaniciáu nel aire
cuandu les tardes fríes dan cuenta del pasáu,
cuandu les grietes mudes son una realidá enriba
la nuesa piel.
Fuxidizo lo humano, les hores de la lluz
y de la risa cuayáronse nos llabios,
y una vegada más torna la incertidume.
Agora, soles la mar y yo, tamién acariciamos la
humidanza les foles
y escuéznos tanta sal de sabores perdíos,
duelnos el nun tener onde afitar los brazos,
ver que l’azul de l’agua s’espalma na nuesa
ausencia.
(Adréi,
2, 1987)
ANUBRIR
Vien la nueche agora,
palmu a palmu,
a pintar les parés d’otres nueches
difuses. Adiéntrase nos cuartos
onde una vez, hai tiempu, nos quememos pa siempres.
Vien la nueche agora
y apiértase a nosotros mediando les distancies.
Pa ponenos na frente un besu de salmueria,
vien la nueche agora
y trainos nes sos manes la so callada sombra.
SETIEMBRE
Depués de los díes de setiembre
(cuandu l’ábregu —sabes—
enllenó de suicidios la ciudá
y tres de sí llevó cualquier tiempu feliz
col que llavar l’alma y la vida
qu’a veces nos asusta) yá namás supi,
sólo volver a ver la nueche en vertical,
los paseos atrevíos alredor
de la fiesta, alredor del vino
que de lloñe trixeron los dioses
a los llabios; depués yá nada, tornar
les alcordances al so sitiu: l’ayer,
el ver llover agora tres los vidros.
AGORA SÉ QUE TÚ TAMIÉN VENDRÍES
Saben poco los dioses de la vida,
del escuru presaxu qu’envuelve la materia
y fai de los pretéritos el llugar del deséu.
Desconocen les tardes y la voz de los cuerpos
llamando la caricia na muda soledá,
nel eco la distancia de la música
el trespasu qu’evoca Budapest.
Nun conocen nel signu la memoria
el recuerdu los ritmos, lo blanco del to rir,
l’agora sé que tú tamién vendríes.
(Aldabes
del olvidu)
PÁRVOLA ENTE LOS MARES
Adientrada en llectures, dafechu tresbolada na
ficción
yá nun me duelgo y permanezo impávida.
Sigue una voz que me dobla na vida
y va comigo siempre amazcarándome.
Ye esa nueva noción de la mentira
namás pa nun sentir y comulgar comu quien
vuelve,
párvola dende anueche, namás por nun llorar
y construyir los mares comu la muerte adulces.
DAQUÉ DE PUERTA ESCURA
Siempre pensé que’l frío
nos cambiaría, que nos fadría escaecer
les güelgues de los cuerpos,
les señales de barro que fraguaron col alba;
que vestiríen el lluto del cantar de malvís,
qu’agora, nesti iviernu, diben borrase.
Que yo nun sufriría, que daqué del mio cuayu
tendría que me valir, daqué de puerta escura
tendría que me quitar la flor en ti,
l’apegu del to nome, les siendes de los llabios
que digo comu ríu, comu la non promesa.
Yo nun diba cayer, siempre allueñada,
nes hores de la mar,
nun–y daría al tiempu cualisquier emoción;
pero l’iviernu impónse con nieve tresparente
faciéndose más puro conforme s’abre en mi.
(Mares
d’añil)
SI FORE PRECISO DESPLICASE
Porque siento que me pisa la memoria
nesti día de mayu esperanzáu,
que voi perder les llaves del to sueñu
y el cantar de los branos y el to nome,
porque mudes van quedar les lletres y la eiría,
porque naide ha guardate del exiliu
nin cantará por ti
les roses de les coses que quiximos.
Porque supi’l nacer que yera’l fin,
qu’un círculu metálicu t’ataba,
porque mal escondíes lo cansao,
namás por eso te viví;
p’apartar de nosostros la mentira,
pa volver otra vez y emocioname,
pa guardate, escribir del to cuerpu
los rasgos de los meses que me dieras.
(Nórdica)