ÁLVAREZ, Xurde

(1973)

 

Nació’l poeta Xurde Álvarez en Sama, Llangréu, nel añu 1973. La poesía d'esti xoven autor debuxa una ponte cola del primer momentu del Surdimientu, la qu'escribién xente como'l primer Sánchez Vicente o José Benito Álvarez-Buylla, alloñándose destamiente de la poesía que s’estila nestos últimos años y mirando pa los maestros de la poesía social más que pa los poetes asturianos de la xeneración anterior (Xuan Bello, Antón García, Pablo Antón Marín...)

 

 

 

 

BIBLIOGRAFÍA

 

Alvarez, Xurde

La Sema / Xurde Alvarez. – Uviéu, Trabe, 1999.

 

 

 

ANTOLOXÍA

 

Como tu,

Yo tamién me desfaigo n’alcordanza de los tiempos

A manes llenes,

De los díes d’abondo, de los años de muncho.

 

Como tu,

Yo tamién escucho n’alcordanza el ruíu del cambéu

Del relevu,

El ruxir del trole, los güelpes del metal contra’l metal,

L’agullíu del fueu nel fornu y el marmuriu de los homes falando

A la fin de la xornada.

 

Como tu,

Yo tamién ascucho agora’l silenciu del trabayu

Que se foi,

El glayíu del tarrén ensin semar, l’ecu del cayer de la lluvia

Nel vacíu de los talleres silentes,

Y esi rinchíu doliosu,

De les cadenes que candaron el pozu.

 

Como tu, yo tamién siento qu’esti descansu ye agonía lenta,

Qu’esti silenciu ye sepulcru vivu,

Qu’esti dir

Ensin saber aónde,

Ensin saber perónde,

Nun ye camín nin ye fonda,

Sinón tiempu perdíu

Y escura lluz que mos ciega.

 

                   ... / ...