ARANGO ALVAREZ, Jesús
(1869–1945)
Nació en Torazu, Cabranes en 1869. Ensin malpenes
estudios, exerció dende bien xoven el comerciu. Simpatizante de la causa
republicana, dedícase a l’actividá política desempeñando´l cargu de conceyal
nel Ayuntamientu de Cabranes en 1906 y el d’alcalde en 1909, dientro de les
files republicanes. Dedicóse tamién al periodismu local y fundó en 1909 el
periódicu El Eco de Cabranes, dende´l
que desarrolló una intensa campaña contra los escesos del caciquismu y a favor
de xeneralizar la educación ente tola población infantil del so conceyu.
Represaliáu tres la guerra civil pol so pasáu republicanu, pasa los sos últimos
años de vida cásique en silenciu y apartáu de too. Fallez en 1945.
Baxo’l so nome real y baxo l’alcuñu de Lin de
Lon, ye autor d’una amplia obra n’asturiano publicada casi per dafechu n’El Eco de Cabranes, na que cultiva per
un igual prosa y versu, siguiendo na tradición costumista de la lliteratura
asturiana d’eses dómines. L’Academia de la Llingua publicó en 1997 un volume
que recueye la obra d’Arango col títulu Versos
y proses.
BIBLIOGRAFÍA
Creación
Arango Álvarez, Jesús
Versos y proses / Jesús Arango Álvarez. — Ed. facs. —
Uviéu : Academia de la Llingua Asturiana, 1997. — 125 p. ; 21 cm. — (Llibrería
facsimilar ; 34)
ISBN 84–8168–089–3
Bibliografía
Xurde Blanco, Entamu a: Jesús Arango, Versos y
proses, Uviéu, Academia de la Llingua, 1997, pp. 7-10.
ANTOLOXÍA
FUXENDO A CABRANES
De Madrid, Sevilla,
Chile, Güenos Aires,
México, L’Habana
Y otres munches partes:
Con cariñu inmensu
Fuxen pa Cabranes
Aquellos fiyinos
Qu’en tierres lexanes
Enxamás se olviden
De sos patrios llares.
¡Qué gustu da velos
Llegar entusiastes,
Al ñerín d’amores
Qué un día dexaren!
¡Cuántos tiernos besos
Ruxen en sos cares!
Fiendo así el descuentu
De tan tristres llágrimes
Qu’al fuxir, por ellos
Cain a raudales.
Qué contentu y gozu
Hai peles quintanes,
Al ver tantu fiyu
Golver a Cabranes!
. . . . . . . . . . . . . . .
Pero, ¡ay! Cuántes penes
Tienen otres madres,
Al ver que los fiyos
De les sos entrañes,
Ximiendo por elles
Allende los mares;
Tarden años y años
Sin venir besales.
. . . . . . . . . . . . . .
Yo que tamién tengo
En tierres extrañes
Peazos del alma,
Xuro: Si a Cabranes
Con salú golviera,
Iré a los altares
Y daré-y un mantu
A la Virxe del Carme.
Lin de Lon
(En Versos
y proses)