ASUR, Manuel

(1947)

Alcuñu lliterariu de Manuel González García, nacíu en 1947 na Güeria Carrocera, Conceyu de San Martín del Rei Aurelio. Poeta de bien estremaos rexistros: de la recreación de la poesía popular a la esperimentación vanguardista, féxose bien popular en too Asturies por mor de la musicalización de lletres suyes pol grupu Nuberu.

Manuel Asur ye con plenu derechu’l primer poeta asturianu contemporaniu. L’apaición en 1977 del so llibru Cancios y poemes pa un riscar supón el pistoletazu de salida de la lliteratura del Surdimientu. El valir d’esti primer poemariu nun s’afaya tanto no lliterario (los resultaos estéticos adolecen d’una cierta heteroxeneidá) como no que representa de novedoso y arriesgao en relación a la poesía qu’hasta entós s’escribiera en llingua asturiana. El propiu Asur reconoz nel "Entamu" a Cancios... esta irregularidá estética y los verdaderos fines colos que s’escribieron los poemes: "Los cancios y poemes qu’agüeyáis nesti llibru son bien heterooxéneos. Dellos tan fechos al rimu de los acontecimientos sociu–políticos de los años caberos. Munchos fueron escritos cola intención de ser entamaos por Camaretá, lo cualo llevóme a una simplificación de formes". El so segundu llibru: Camín del cumal fonderu prosigue temes, estilos y formes ya ensayaos nel poemariu anterior, anque nésti el poeta de La Güeria amuesa una mayor ambición estética. En palabres del críticu Xosé Bolado: "Esta embelga supunxo un reblagu nel tratamientu de ‘topoi’ universales na llingua lliteraria asturiana. Un rexistru más variáu d’esmoliciones separta esta obra del primer volumen, más elemental ya cenciellamente zarráu nes llendes de la poesía social."

Vívese d’oyíes (1979), Congoxa que ye amor (1982) y Destruición del poeta(1984), distintos nel tiempu y nos enfotos estéticos a los sos primeros llibros, representen la madurez de Manuel Asur como poeta. En 1997 axunta la so obra nel volume Poesía reunida: 1976-1996.

Como narrador, Manuel Asur publicó en 1988. Hai una llinia trazada, desigual conxuntu de relatos que’l propiu autor califica de "cuasi monólogos. Monólogos de soledá, cola soledá, pa la soledá. Esa soledá que’l filósofu Kant maxinaba ensin el mundu físicu"

Colaborador habitual del diariu uvieín La Nueva España. A finales de los 80 abandonó la escritura lliteraria pa dedicase al estudiu de la filosofía. En 1997 prologó la reedición de la obra Filosofía de lo maravilloso positivo del avilesín Estanislao Sánchez Calvo, sobre'l que lleó la tesis doctoral en marzu del 2000.

BIBLIOGRAFÍA

Creación

Asur, Manuel

Cancios y poemes pa un riscar /Manuel Asur. — [s.l.] : l’autor, 1977. — 96 p., 6 f. ; 22 cm.

ISBN: 84–4003593–4

Asur, Manuel

Camín del cumal fonderu /Manuel Asur. — [s.l.] : l’autor, 1978. — 86 p., 5 f. ; 21 cm.

ISBN: 84–5002951–1

Asur, Manuel

Vívese d’oyíes: Poemes bilingües / Manuel Asur. —Uviéu : Seminariu de Llingua Asturiana, 1979. — 22 f. ; 22 cm.

ISBN: 84–6001484–3

Asur, Manuel

Congoxa que ye amor / Manuel Asur. — Uviéu : Seminariu de Llingua Asturiana, 1982. — 33 p. ; 21 cm. — (Estaya literaria ; 8).

ISBN 84-300-7245-4

Asur, Manuel

Destruición del poeta / Manuel Asur. — Uviéu : Academia de la Llingua Asturiana, 1984. — 55 p. ; 22 cm.

ISBN 84-600-3778-9

Asur, Manuel

Hai una llinia trazada / Manuel Asur. — Uviéu : Academia de la Llingua Asturiana, 1988. — 62 p. ; 20 cm. — (Llibrería académica ;10).

ISBN 84-600-5309-1

Asur, Manuel

Poesía (1976-1996) / Manuel Asur. — Uviéu: Trabe, 1996. — 201 p. ; 21 cm. —(Albera; 1)

ISBN: 84–80530–68–5

Edición lliteraria

Sánchez Calvo, Estanislao

Filosofía de lo maravilloso positivo / Prólogos de Manuel Asur y César García de Castro Valdés. —Xixón : Llibros del Pexe, 1997. — 253 p. ; 21 cm. — (Sui Géneris ; 5)

ISBN: 84–87259–88–X

Bibliografía

Manuel Asur, “Entamu” a Cancios y poemes pa un riscar. Uviéu, 1977, p. 5.

Manuel Asur, “Entamu” a Hai una llinia trazada. Uviéu, 1987; p. 9.

Xosé Bolado, “Entamu” a Antoloxía poética del Surdimientu, Xixón, Ateneo Obrero, 1989; p. 8

Xuan Xosé Sánchez Vicente, Crónica del Surdimientu, Oviedo, Barnabooth, 1991.

ANTOLOXÍA

EL MIO CUARTU

Nes parés del mio cuartu

una murnia volcánica

pinga penes amarielles

y parda indiferencia.

Hai un bermeyu llamparón trespasáu

por quince mil anfileres multicollores

qu’esfelpéyense en frebes de borrina.

Borrina que frañuca,

qu’avienta,

que tracamúndiase nuna congoxa de muerte infinita.

(Camín del cumal fonderu)

IDENTIDÁ NACIONAL

¿Esti nenu quién será?,

¿nun tien aire divinu?,

¿nun s’asemeya a un chinu

nel so reondu mirar?

Yo adivino en so dulzor

daqué rispiu d’amargor

nun ambiente escolar.

Yeren tiempos onde’l lema:

“la lletra con sangre entra”

fue fundamentu moral.

Tuvo esti nenu un arrieru

camufláu, de maestru,

cola so costume d’espertu

nel arte de cimbliar

una cibiella d’ablanu:

¡viva’l viciu anglicanu

pola gloria nacional!

Dafechu fue panacea

pa la educancia pueril,

amestar castigu viril

con vieya farmacopea.

¡Ah, sol racial, xabaz pendón

del fraile y el caballeru,

honores del maxisteriu

tradicional español!

(Poesía (1976–1996)