BERROS,
Xulio
(1963)
Nació en Sotrondiu, San Martín del Rei Aurelio,
en 1963. Profesor d’enseñanza primaria, ye un autor especializáu esclusivamente
en lliteratura infantil y xuvenil.
Hasta la fecha tien publicaos cinco
llibros: Lo mío cómu ye (1994), Maxa de branu (1996), Fuera de xuegu (1998), Toya (1998) y La triba de Xinés
(1998). Con motivu de la publicación de la so primer obra en 1994 declaraba a
los posibles llectores que con esti llibru pretendía "namás que pueas
pasar dalgún momentu bonu cola llectura y si amás te suena dalguna de les
situaciones qu’apaecen, meyor que meyor". Esa declaración ye bien
representativa del so mou de facer, que caltién siempre los pies bien llantaos
nel mundu real y cotidianu que viven los rapazos d'anguañu.
Xulio Berros tien publicao tamién un relatu
nel númberu 2 de la revista Sietestrellu, col qu’algamó’l II Premiu de Cuentos
de Riaño-Llangréu, y participó nel volume colectivu Cinco años de
lliteratura asturiana, d’Editora del Norte.
BIBLIOGRAFÍA
Creación
Berros, Xulio
Lo mío, ¿cómo ye? / Xulio Berros ; dibuxos de
Germán García. — Uviéu : Trabe, 1994. — 99 p. : il. ; 19
cm. — (Montesín ; 12).
ISBN 84-8053-030-8
Berros, Xulio
Maxa de Branu /Xulio Berros. Mieres : Editora
del Norte, 1996. — 124 p. : il. ; 19 cm. —(El fumu de
los trenes ; 6)
ISBN 84–88660–42–1
Berros, Xulio
Fuera de xuegu / Xulio Berros ; ilustraciones,
Forma. -- Mieres : Editora del Norte, 1998. -- 117 p. : il.; 19 cm. -- (El fumu
de los trenes ; 8)
ISBN 84-88660-63-4
Berros, Xulio
Toya / Xulio Berros ; dibuxos de María Amor. --
Uviéu : Trabe, 1998. -- 32 p. : il. col. ; 19 cm. -- (Montesín redrueyu ; 5)
ISBN 84-8053-097-9
Berros, Xulio
La triba de Xinés / Xulio Berros ; ilustraciones
d’Eulogio González. -- Mieres : Editora del Norte, 1998. -- 43 p. : il. col. ;
19 cm. -- (La viesca les lletres)
ISBN 84-88660-79-0
Bibliografía
“Xulio Berros”, en: Xulio Berros, Lo
mío, ¿cómu ye?, Uviéu, Trabe, 1994. p. 97.
ANTOLOXÍA
FUEU
NEL TOCADISCOS
Xicu xubía les
escaleres de casa a toa velocidá. Diba cuntando los escalones qu’entá quedaben
pa llegar a la puerta. “Cincuenta, cuarenta y nueve, cuarenta y ochu...”
mientres alendaba fondamente.
Taba gayoleru,
bramente emocionáu. Yera ún d’esos momentos nos que nun sabes si paga la pena
esperar otru migayín más o bien lo meyor yera gociar d’él yá mesmo. Ente les
manes llevaba’l caberu L.P. de “Los Héroes del Silencio”, taba calentín,
acabante mercalu. Naguaba por entamar a sentilu.
—Tres, dos y...
p’adientru —glayó, abriendo la puerta d’un xeitu qu’enxamás lo ficiera, comu pa
salir nel llibru los records, polo aína que fizo tola operación.
Quitó la cazadora
vaquera y llanzóla dende cuasi un metru distancia hasta l’arrudu y lo más
ablucante de too ye que foi quién a dexala nel so sitiu, al llau de la
espantible chamarra de so pá. Enxamás atalantó cómu so pá podía dir a nengún
llau con aquel cachu llana de cuadros bermeyos y verdes. A Xicu de xuru que
cayía la cara de vergoña nel casu de tener que poner tala vistimenta. Pero so
pá yera asina.
—¡Toi pa ello güei!
—glayó al altu la lleva.
La gayola yera enforma
esbordante, coló dafechu pal salón de la casa y darréu, comu encerriscáu,
empobinó pal aparatu música. Llevantó la tapa, garró’l brazu del xiradiscos
cola mandrecha y cola manzorga allugó’l discu nel aparatu. Tremáben les manes,
nun yera a esperar un intre más. Milenta domingos d’aforru, de fartucase de
televisión, de sentir namás que’l ruxerruxe cafiante de la radio de so pá
cuspiendo aquello de: “Pi, Pi. Pi... Pi PENALTY NA ROMAREDA...., GOL DE
ZAMORANO”.
Y too aquel
sufrimientu pa poder mercar el caberu L.P. del so grupu favoritu. De toles
maneres, a Xicu nun facía plizca gracia tener que comprar un L.P. al final del
sieglu venti, en plenu desendolque del rayu láser y la informática; ensin falar
de la cabera novedá qu’asoleyara la Phillips: El DCC, el dixital compactu
cassette. Cuandu a Xicu viníen a la memoria estos fechos baxába la moral al
sótanu.
Asitió l’aguya del
tocadiscos a la veriquina del primer surcu del vinilu y empecipió a sentise la
música.
Darréu Xicu fizo lo de
siempres, ye dicir, poner la música al altu la ll eva. E1 primer canciu taba
sonando, más bien atronando.Y lo d’atronar nun ye un dicir, de xemes en cuandu
ente la música mecíense delles truenes, xarazu y orbayu de lo más real.
Xicu, avezáu a esta
situanza, púnxose en disposición de disfrutar de la música, escaeciendo los
efectos meteorolóxicos que soltaba l’aparatu. Camudó les camperes por unes
zapatielles y empobinó pal sofá. A elli lo que prestaba en verdá yera sentir la
música cómodu y camentaba que’l llugar más afayadizu pa ello yera’l sofá. Comu
él dicía:
—La música ye pa
gociar d’ella y ta claro que pa eso nun hai sitiu comu’l sofá; ye más, lo meyor
ye sentila echáu en sofá.
Claro que lo que nun
se escaecía a Xicu yera qu’aquel sofá, precisamente aquel sofá, dexaba abondo
que deseyar; pola escontra, podía dicise bien que se trataba del llugar
perfechu pa fastidiar l’espinazu. Por más qu’ún arreblagara nél nun tenía
manera de ponese en posición prestosa, siempres se topaba con daqué, con
dalguna de l es costures de los coxinos, coles espantibles floritures del
respaldu, más dures qu’el pan de los domingos..., en fin, una braera filtraya
de sofá; pero comu nun teníen otru...
Xicu taba ablucáu cola
música, él mesmu diba berriando los cancios cola axuda de les lletres que
veníen na funda del discu. La verdá, si camentamos nos cuatru llargos domingos
que costó la compra de tala maravía, yera lóxico atalantar l’enfotu col que
Xicu siguía ca canciu. ¡Comu pa que nun prestara!
Cuatru domingos en
casa, ensin tar castigáu y cuandu se tienen catorce años nun ye cosa corredera.
¿O sí?
De sópitu, y comu
siempre asocede nes películes, entamaron los problemes. La música malapenes
s’oyía, el cantante empecipió a tatexar y más que música aquello paecía una
tormenta xabaz.
“¡Maldita seya, tolos
díes tamos colo mesmo!” camentó pa ente sí Xicu,
—¡Normal! D’esti
trastu qué vas esperar—glayó con desesperu.
Al rapaz nun faltaba
razón, el cacharru yera “antidiluvianu”, pero lo que yera más cierto ye que
I’aparatu música yera lo más nuevo de tol salón. Al llau de los muebl es paecía
un trastu sacáu d’una “peli” de ciencia ficción.
Xicu llevantóse y foi
hasta l’aparatu. Apagólu y encendiólu aína, unes quince vegaes, y comu davezu
la operación dio los resultaos apetecíos. Percorrió los dos metros y mediu que
lu separtaben del sofá, pegó un blincu y estrapallóse nel so sitiu favoritu.
Achucóse nél, garró otra vez les lletres de los cancios y...
—¡Coime, va ser verdá
eso de que les desgracies enxamás aporten soles!—glayó, notándose el mal
lleche.
Nun entamara pa entós
el segundu canciu de la cara A, cuandu la tormenta que cuspía’l tocadiscos nun
la firmaríen nin los responsables d’efectos especiales de Terminator II. La
muga, amestada con truenos pergrandes y xarazu asgaya, nun dexaba sentir res de
música. Xicu saltó del sofá y drechu empobinó pa la tormenta. Llevantó la
mandrecha col puñu zarráu y espetó al diañu del aparatu un mocada d’impresión.
—¡Toma, babayu, onde
más te duel, nes conexiones del amplificador! —dixo Xicu con seguranza,
dominando la situación, nuna pose que nin Indiana Jones.
Embobáu y cuasi
viéndose con sombreru de cueru y llátigu, nun se decató d’un cruxíu ¡crahsss!
qu’enllenó tol salón. La mesa na que s’allugaba l’aparatu tarazó en milenta
cachinos. Al ver la escena camudó-y la color de la cara. Taba esblanquiñáu. Al
empar, delles idegues en tamaben a esnala na tiesta soltó dalgunes al aire:
—¡Mio ma mátame! ¡Mio
pá desfáime en cachos!…
El restu los sos
camientos diben per esa llinia.
Ente tanto, la cosa
envede ameyorar púnxose cuasi que tráxica. Mientres Xicu trataba de decidir la
meyor opción ente afuxir o dexar que lu mataren, del tocadiscos entamó salir un
fumu abuxaracao que nun podía ser bona seña. Xicu decatóse, por fin, del fumu.
Foi quien a mirar que naquel salón daqué taba quemando. Amás del fumu, hasta
les sos naplies aportaba ciertu arrecendor que facía alcordase de les bolses de
pipes que prestaba quemar na cai, col mecheru que arrampuñara nuna ocasión a so
pá, en venganza por un discutiniu que tuvieren y del que Xicu nun saliera bien paráu.
Xicu, yá enfotáu na tema, acolumbró cómu’l techu del salón camudaba’l blanco
por una color prieto, al empar que del aparatu música surdía una llapa que
menaciaba con llegar hasta la vitrina. Vitrina ésta que tenía, según el rapaz,
más años que’l tabacu. De xemes en cuandu la ma remembraba que facía diecisiete
años que taba puesta ellí. Nesos momentos Xicu pensaba pa ente él que nun yera
posible que nos años sesenta ficieran coses tan despreciatibles.
—¡EI que la “diseñó”
taría enfiláu naquel momentu!—avezaba Xicu a llanta a la ma cuandu falaba de la
vitrina.
A lo que’l pá
retrucaba:
—¡Pues tamos comu pa
mercar muebles agora! Ca vegada los gastos en casa son mayores, medren al mesmu
ritmu que tú.
Per aquella dómina taben
Xicu y el pá en plenes negociaciones, al dericando pol nuevu conveniu de Xicu.
El rapaz desixía delles coses al pá, ente otres:
—Mil duros de paga
mensual, a cobrar el día ún de ca mes.
—Xándales pal colexu y
pa salir namás que de marca.
—Coca Cola ensin tasa
na nevera.
La negociación yera
abondo dura y taba cuasi en puntu muertu. El pá ufiertába lo que va darréu:
—Non más de 2500
pesetes al mes.
—Xándales del
economatu.
—Un par de Coca Coles
pala fin de selmana.
El pá nun yera
favoratible a ceder nin un migayu nuna negociación, magar que Xicu se punxere
robezu y menaciara con facer una fuelga de fame... namás cuandu hubiere
garbanzos pa xintar. Amás, yá metíu na griesca reivindicativa, ficiera en
pasiellu casa un par de pintaes nes que se podía lleer:
“¡Nel economatu nun
hai calidá! ¡Puxa Nike, abaxu Sabadell!”
Y ye que yá lo dicia
Xicu a so pá cuandu se torcíen les negociaciones:
—Cafiante ¡Cómu se te
nota que tas enguedeyáu no del Comité de la fábrica!
(... / ...)
(¿Lo mío,
¿cómu ye?)