CAMPO
CASTAÑÓN, José
(1921–1992)
Naz
José Campo el 21 de xunu de 1921 en Morea d’Ayer. Fíu de mineru, los sos años
de formación viéronse marcaos por tres fechos fundamentales: la Revolución del
34, la Guerra Civil y la muerte del padre en 1941.
Fue mineru d’una sola xornada: xustamente’l
día qu’entamaba a trabayar enterrólu un derrabe de carbón. Esti accidente
dexólu imposibilitáu pal trabayu de la mina, entrando al pocu nel Ayuntamientu
como funcionariu.
Personaxe popular y amigu de chancies,
perteneció Pepe Campo a esa estirpe de poetes xuglares, siempre atentos a los
asuntos d’actualidá y siempre buscando la satisfación (nesti casu les risaes)
de los escuches o llectores, colos que caltuvo una total sintonía. La d’él ye
siempre una poesía de circunstancies: fechos cotidianos, asuntos amorosos, los
deportes, la caza, el conceyu natal... son l’oxetu d’atención de los sos
versos.
Xunta otros amigos, fundó nel añu 1978 la
Tertulia Lliteraria Ayerana. José Campo Castañón morrió’l día 16 de mayu de 1992.
Esi mesmu añu la Sociedá Humanitarios de San Martín edíta–y el llibru
d’homenaxe Cosuques de neños y poemas a
S. Martín y en 1996 la mierense Editora del Norte asoleya, en dos volúmenes
al curiáu d’Ánxel Álvarez Llano, la obra completa del autor ayeranu.
BIBLIOGRAFÍA
Creación
Campo Castañón, José
L’aldea Soleyera / José Campo Castañón ;
prólogo de Luis Aurelio Álvarez. – Moreda : [s.n.], 1965. —104 p. ; 17 cm
DL O 275-1965
Campo Castañón, José
Pólvora y fumo : Cuentiquinos de caza /
José Campo Castañón ; pról. de Oscar Luis Tuñón. — Moreda, [s.n.], 1966. — 53
p. ; 15 cm.
Campo Castañón, José
Per les caleyes d’Aller / José Campo
Castañón ; pról. de Jesús Castañón. — Moreda, [s.n.], 1968. — 110 p. ; 17 cm.
Campo Castañón, José
Antoloxía / José Campo Castañón. — Aller
: Ayuntamiento, 1983. — 227 p. : il. ; 25 cm.
ISBN 84-500-8379-6
Campo Castañón, José
Cosuques de neños y poemas a San Martín /
José Campo Castañón. — Moreda : Humanitarios de San Martín, 1992. — 144 p. :
il. ; 21 cm
DL AS 3662-1992
Campo Castañón, José
Obra completa : 1921–1992 / José Campo ;
edición y prólogu, Ánxel Álvarez Llano; notes llingüístiques, Mª Paz García
Álvarez. — Mieres :Editora del Norte, 1996. — 2 v. : il. fot. ; 22 cm. — (Serie
Mayor ; 1-2). —
ISBN 84–88660–50–2 (O.C.)
Bibliografía
Ánxel Álvarez Llano, “Introducción” a:
José Campo, Obra completa, Mieres,
Editora del Norte, 1996, T.I., pp. 9–18.
Carmen Díaz Castañón, “José Campo
Castañón”. En: Literatura asturiana en
bable, Salinas, Ayalga, 1980, p. 163.
“Campo Castañón,
José”. En: Gran Enciclopedia Asturiana,
Gijón, Silverio Cañada Editor, 1970, T. III, p. 243.
ANTOLOXÍA
Primeru, el deber
Atopó Pin el
Esquil
a so amigu Lin
Corteya,
que venía del
molín,
y falucó–y a la
oreya:
—Tuve viendo la
peral
del tíu Tomasón
Llagañes;
ta tan cargá,
tan cargá,
qu’esgayen toes
les cañes.
¿Qué te paez si
gëi vamos
a face–y una
llimpieza?
Y al momentu,
Lin Corteya,
arrespondió–y
con tristeza:
—Non, Pin, pero
pues creyeme
que siento nun
dir a peres;
to qu’ayudar a
mio pá
a facer los mios
deberes.
Mal deportista
Sindín el fíu de
Casildra,
más conocíu por
“EI Peque”,
al decir de tola
xente
yera más malu
que’l Meque.
Ansina ye que,
un bon día,
fexo unes
cuantes trastaes
y so pá, muy
enfadáu
solmenó–y unes
ñalgaes.
Lloraba con
desconsuelu
cuandu–y dixo
una señora:
—Sólo fueron dos
ñalgaes;
per tan pocu nun
se llora.
¿Quieres ser
boseador
y pegues esos
berríos...?
—¡Pero diome
golpes baxos
y esos nun tán
permitíos!
Protesta
Están llocos de
contentos
en cá de Xuan el
de Xustu,
pos acaba de
ñacer
un neñu guapu y
regustu.
Per la terdi,
una vecina,
preguntó–y a
Felisín
cuandu diba pa
la escuela:
—¿Compraste un
nuevu hermanín?
El rapacín
siguió andando
col focicu too
engrifáu,
pero al pocu da
la vuelta
y responde engafentáu:
—Pa eso sí, sí
qu’hai perres,
pero en cambiu
¡caso en tal!
pa comprame una
pelota
dicen que nun
hay un rial.
(Obra
completa : 1921–1992, I)