CAMPO Y CAÑAVERALES, Higinio del

(1808–1885)

 

Fíu de pixuetu, nació Higinio del Campo en Madrid en 1808. Estudió medicina y exerció en Cuideiru, La Pola Sieru, Lluarca, Xixón y, dende 1879 n’Uviéu; dirixó tamién el Balneariu de Fuensanta, en Nava. Los sos brillantes trabayos d’investigación sobre la pellagra diéron–y gran reputación nel so mundu profesional. Morrió n’Uviéu en 1885.

   Canella diznos qu’Higinio del Campo fue autor d’unes poques poesíes n’asturiano y recueye’l empiezu d’un llargu romance que publicara en 1851 n’El Ovetense, tituláu “L’Enviernu: Costumbres asturianas” (v. antoloxía).

 

 

 

BIBLIOGRAFÍA

 

Creación

 

Poesías selectas en dialecto asturiano / [ed. y sel.] José Caveda y Fermín Canella Secades. — Uviéu : Academia de la Llingua Asturiana, 1987. — 317 p. ; 19 cm. — (Llibreria facsimilar ; 1). — Reprod. facs. de la ed. de: Oviedo : Imp. de Vicente Brid, 1887.

ISBN 84-600-4812-8

 

Bibliografía

 

Fermín Canella Secades, “D. Higinio del Campo y Cañaveras” en:  José Caveda y Fermín Canella Secades (eds.), Poesías selectas en dialecto asturiano , Oviedo : Imp. de Vicente Brid, 1887 (ed. facs de 1987 de l’Academia de la Llingua), pp. 276–277.

 

“Campo y Cañaveras, Higinio del”, en Gran Enciclopedia Asturiana, T.III., Gijón, Silverio Cañada, 1982, p. 243

 

 

 

ANTOLOXÍA

 

L’ENVIERNU

(Costumbres asturianas)

 

   ¡Ijujú, viva l’enviernu!

Cuerra’l vrano noramala

Vaya cun sos bonos díes

E sos nueches estrelladas;

Que yo prefieru aquel tiempu

Cun sos xelos, cun sos aguas,

Llargas nueches, curtios díes

Cargados de borrinada:

Ya también quieru la nieve

Per les lloses y montañas,

Ya per árboles y teyes

Colgantes d’agua xelada

Y a veces entre’l tempazu

Oír cómo ruxe l’agua,

y soplame les manines

Si me pesca l’alborada

Per les tierres y caleyes

Viniendu de la esfoyaza.

¿Hai mior tiempu qu’aquel

En que la barriga canta,

Ya fartu cuerre unu’l mundu

Cortejandu las rapazas?

Pus pa eso ¡viva l’enviernu!

Y el que diga non, que salga.

        .  .  .  .  .  .  .  .

        .  .  .  .  .  .  .  .

 

                   (Poesías selectas en dialecto asturiano)