CÓNSUL, Teresa

(depués de 1760–1834)

Nació, según l’investigador Älvaro Ruíz de la Peña, na Pola Sieru depués de 1760. Esti investigador especula cola posibilidá de que fuere fía del pintor Xuan Nepomuceno Cónsul y de la hermana de Xuan González Villar, l’autor de La Xudít. En 1787 profesa como monxa benedictina nel conventu de Santa María de la Vega d’Uviéu; nesti cenobiu va pasar el restu de la vida, ocupando diversos cargos dientro de la congregación, hasta la so muerte acaecida en 1834. Insertada por Ruíz de la Peña nel grupu d’autores en llingua asturiana qu’él llama del "mediu sieglu" (Xosefa Xovellanos, Balvidares, Fernández Cepeda...), anque abondo más xoven que la mayoría d’ellos, Teresa Cónsul ye autora de diversos testos na nuestra llingua, según Constantino Suárez, Españolito; d’ellos namás se conserva un entremés escritu n’asturiano, castellano y con dalgunes frases en gallego, ilocalizable hasta’l so afayu a mediaos de los noventa d’esti sieglu ente los fondos de la biblioteca de Fuertes Acevedo que guarda’l RIDEA. Poles investigaciones de Ruíz de la Peña sabemos que l’entremés representóse’l 21 de marzu de 1789, día de San Benitu, nel Monesteriu La Vega, n’honor de la so abadesa, Benita de Merás. En 1996 publicólu Älvaro Arias Cabal na colección Cartafueyos... de l’Academia de la Llingua.

BIBLIOGRAFÍA

Creación

Cónsul, Teresa

Entremés : (1789) / Teresa Cónsul; edición, entamu y notes d’Álvaro Arias Cabal — Uviéu : Academia de la Llingua Asturiana, 1996. — Ed. facs. — 31. ; 15 cm. — (Cartafueyos de lliteratura escaecida ; 11).

ISBN 84-8168-059-1

Bibliografía

Álvaro Arias Cabal, entamu a: Teresa Cónsul, Entremés : (1789), Uviéu, Academia de la Llingua Asturiana, 1996.

Álvaro Ruiz de la Peña, Introducción a la literatura asturiana, Uviéu, Biblioteca Popular Asturiana, 1981. pp. 88 y 118.

Ruiz, "Notas para la biografía de una poetisa en bable del siglo XVIII: Teresa Cónsul". Boletín del Centro de Estudios del Siglo XVIII, 7 y 8. Uviéu, 1980, pp.141–145.

Constantino Suárez "Españolito", Escritores y artistas asturianos. 7 vol. (vols. 3 a 7, ed. y adiciones de José María Martínez Cachero). Madrid-Uviéu, 1936, p.59.