DÍAZ GARCÍA, Ramón

 

 

Más conocíu como Monchu Díaz. Nació en Xixón. Participó na puesta en marcha de l’asociación Conceyu Bable, ocupando’l cargu de “ayalgueru” (tesoreru) na so primer Xunta Directiva. Fue colaborador de les emisiones n’asturiano de Radio Xixón y de les páxines de la primer época d’Alitar Asturies n’El Comercio. Fue secretariu xeneral del sindicatu CNT n’Asturies.

En 1984 publicó’l so primer y únicu llibru: Rezumes d’amor y griesca. Trátase d’un conxuntu de poemes mui diversos, ente los que predominen los de temática y denuncia social; hai tamién nellos sitiu pa la recreación de formes típiques de les vanguardies como’l caligrama y pa la reflesión esistencialista.

La obra de Monchu Díaz entronca cola corriente de poesía “militante” qu’inauguró Manuel Asur y que siguieron, xunta Díaz, otros autores del entornu de Conceyu Bable como Xosé Manuel Fernández Vega o los autores representaos n’antoloxía Del aráu a la pluma (1977).

 

 

BIBLIOGRAFÍA

 

Creación

 

Díaz, Monchu

Rezumes d' amor y griesca / Monchu Díaz.. — Xixón : Comuña Lliteraria, 1984. — 66 p. ; 17 cm

ISBN 84-398-0877-1

 

 

 

ANTOLOXÍA

 

IRIS

 

Llibre, fía mía,

quiérote llibre.

 

El to cuerpín menudu

que ximielgues col automatismu la gayola

en cuantes la música t’adientra

nel oyíu.

Que tien la bandola propia

de les nenes que nun dexen

que la comida llore de murnia en platu.

Que–y presten les arrascaes que–y fai

so pá, les nueches que’l suañu

niégase dientrar na cuna.

El to cuerpín, que será mozu dalgún díe

dotándolu natura de los atributos

propios de la muyer.

Que será naguáu y respigaráse

en cuantes atope’l camín de los abrazos.

Esi cuerpín, tien que facese nel tiempu ensin qu’ésti–y

forme una cadarma de fierru alredor.

 

Llibre, fía mia,

quiérote llibre.

 

Llevantando les manes hasta que les yemes

de los deos sientan el contautu del collaciu,

el saludu solidariu la xente’l pueblu

o les rociaes del orpín de los carbayos.

Puxándoles, ensin torgaúres, escontrarriba

talo que les llevantes güei

buscando’l neru los brazos de to ma,

pa caer dientru, pesllando los güeyinos,

y caleyando pel reinu de los suaños.

 

Llibre, fia mía,

náguote llibre.

 

 

ENTE LES PEÑES

 

Tomaréte otra vegada pente les penes

xuníes pela inercia la natura

a los sitiales fondos.

Caleyaremos abrazaos debaxo de les nubes

y el suelu que pisemos

formaránlu les gotes del orpín

metá del cielu.

 

                    (Rezumes d’amor y griesca)