ELIPE RAPOSO, Xulio

1962

Naz n’Avilés nel añu 1962. Ye’l fundador del grupu musical de “rock radical astur” Dixebra, qu’entama xunto con Cesáreo García en1987. Al lláu de Xuan Bello, Xuan Inaciu Llope y otros, empobina’l programa de Radio Asturies Nortiando nos primeros ochenta. Coordinó dellos programes más en Radio Avilés, organizando varios maratones n’asturiano nos Díes de les Lletres Asturianes. Editó tamién en collaboración con Cesáreo García la revista-fancine L’Esperteyu. Trabaya impartiendo cursos formativos a los y les inmigrantes en Comisiones Obreres d’Asturies.

Impartió clases de llingua asturiana y montó la productora discográfica L’Aguañaz, especializada en música folk y rock. Nel añu 97 llogra xuntar a delles formaciones musicales de distintes comunidaes del estáu y entama’l discu colectivu L’asturiano muévese, onde grupos como Os Diplomáticos de Monte Alto, Celtas Cortos, Siniestro Total y otros apoyen la llingua cantando los sos temes n’asturiano. En 1997 publica el estudiu Llingua y rock, onde fai un repasu a la música folk y rock fecha n’Asturies y n’asturiano nos últimos años.

BIBLIOGRAFÍA

Ensayu

Elipe, Xulio

Llingua y rock (1976–1996) / Xulio Elipe ; entamu d’Adolfo Camilo Díaz. — 2ª ed. rev. y aum. — Uviéu : AYDA, 1996. — 123 p. ; 20 cm. — El llibru acompáñase del CD “Sáca–yos la llingua”.