FERNÁNDEZ, Baldomero

(1871–1934)

Nació n’Uviéu en 1871. Músicu y escritor ocasional en llingua asturiana. Fue Baldomero Fernández, al dicir de dalgunos investigadores que s’ocuparon de la so figura, un home dotáu pa la composición y la execución musicales que por circunstancies vitales adverses vio malograda la so carrera como artista.

Interesáu pol folklor tradicional armonizó sinfinidá de melodíes populares y recreó sobre otres, pieces coles que quixo, según afirma José Benito Álvarez-Buylla (1977) "elevar las canciones asturianas al nivel de lieder de concierto". En palabres d’Álvarez-Buylla, Baldomero Fernández “no es puramente un musicólogo o un coleccionista de antigüedades sino sobre todo un auténtico creador”. Como soporte pal so llabor de recreación de pieces tradicionales igüó'l cancioneru Canciones asturianas que se dio a estampa nel añu 1914, una recopilación de cuarenta melodíes armonizaes lo mesmo pa pianu que pa canciu. Ye autor de diverses composiciones inspiraes na música tradicional asturiana; ente elles: "De la tierrina (Danza asturiana para orquesta)", "Alborada" pa quintetu d’arcu y pianu; "Danza Vaqueira", pa pianu solu; "Aramo, bellísimo Aramo" o ^"Rapsodia asturiana", entrambes pa pianu. Ye autor tamién d’un monólogu en llingua asturiana tituláu Un día en Uvieo que se representó con gran ésitu de públicu n’Asturies y nes colonies d’emigrantes asturianos de Cuba y l’Arxentina.

Acabó los sos díes prácticamente na miseria, acompañando col so pianu les proyecciones de películes de cine mudu nes sales d’Uviéu delantre un públicu que lu escarnizaba gritándo-y: "¡Baldomero, pisa! ¡Toca más, mangante!", según cuenta Carmen Díaz Castañón (1976). Falleció en 1934.

Gabriel Martínez García publicó una biografía del músicu y compositor uvieín en 1975.

BIBLIOGRAFÍA

Creación

Fernández, Baldomero

Un día en Uvieo:(Monólogo en bable) / Baldomero Fernández. — 2ª ed. aum. / con una carta de Fermín Canella. — Oviedo : [s.n.], 1912. — 22 p. ; 19 cm.

Bibliografía

Carmen Díaz Castañón, Lengua y literatura, Xixón, Júcar, 1981, p. 89, 277.