FERNÁNDEZ SANTA EULALIA, Francisco

(mediaos del XIX-1901)

Nacíu n’Avilés na metada del sieglu XIX, Francisco Fernández Santa Eulalia emigró pa Cuba siendo un rapaz, dedicóse primero ellí al comerciu y depués al periodismu, fundando publicaciones como El Dependiente (1878), El Progreso Mercantil y El Heraldo (1885). Nel rodiu d’esti periódicu diba costituise’l Centru Asturianu de L’Habana, del que fue secretariu Fernández Santa Eulalia. Morrió l’autor avilesín en L’Habana’l 13 d’Agostu de 1901, depués de facer l’añu anterior un últimu viaxe per Asturies.

En L’Habana publicó tres llibros: la obra teatral Andresín el de Raíces o Una promesa incumplida (1883), que s’estrenó tamién con munchu ésitu na capital caribeña; la novela en castellano Peregrina del Rosal, vírgen y mártir (1888) y un volumen misceláneu titulaú Pote asturianu (1899–1900) onde recueye les sos collaboraciones espardíes pela prensa cubana.

Andresín el de Raíces recoyóla Protasio González Solís pa les sos Memorias Asturianas y reeditóse en 1918 na Biblioteca de Autores Asturianos de Pachín de Melás. En 1992 l’Academia de la Llingua publicó la obra n’edición facsímil de la de 1890.

BIBLIOGRAFÍA

Creación

Fernández Santa Eulalia, Francisco

Andresín el de raíces / Francisco Fernández Santa Eulalia. — Ed. facs. — Uviéu : Academia de la Llingua Asturiana, 1992. — 35 p. : il. ; 19 cm. — (Llibrería facsimilar ; 17)

ISBN 84–86936–77-2

Bibliografía

Constantino Suárez, Escritores y artistas asturianos, T. III., Madrid, 1936, pp. 361–363.

Carmen Díaz Castañón, “Fernández Santa Eulalia, Francisco”. En: Lengua y literatura, Gijón, Júcar, 1981, pp. 278.

Antón García, “Francisco Fernández Santa Eulalia”. En: Lliteratura asturiana nel tiempu, Uviéu, Conseyería d’Educación, 1994, p. 85.

ANTOLOXÍA

Andresín el de raíces

acto primero

Interior de una casa de aldea. Puerta al fondo y una a la izquierda de actor. A la derecha un llar en el que habrá colgado un pote; un escudillero, una masera, un arca y tres tayuelas. Aperos de labranza.

Escena Primera

Sr. Juan, D. Luis

SR. JUAN— (¡Que yo non pueda llograr del siñor Conde una espera! (Pausa). Trece años fai que n’arrieno llevu la llosa del Regueral, con los praos del Pintón y de la Sierra... Treci años xustos, en que díe tres díe fixe a sos tierres rendir con el sudor de mio frente salutable frutu sin que podiera librar pa mio familia más qu’un pasar de tristura… y hoi en que la necesidá m’obliga a char del mio llao al fío de mios entrañes, venís a notificame de parte del siñor Conde, vaya dexandu estes tierres, si non cumplo hoi mesmu con el arriendu… Non lo fagáis por esti que vos fala. Don lluis, facé–ylo per mio familia que quedaráse sin pan y sin abrigu…

D.LUIS.— ¿Y a dónde va vuestro hijo?

SR. JUAN.— Va pa la Bana, señor…

D.LUIS.— ¿Tiene parientes allí, o amigos que le reciban?

SR. JUAN.— Naide (con amargura). El señor de cielus y tierra, que nun lu abandonará… El ye buenu, dócile y hacendosu… y asina comu a otros los ha favorecido la fortuna, tamién es¡ero que le sirva a él.

D.LUIS.— Grande locura me parece… Arrancar un niño de los brazos de su madre… exponerlo a los peligros de la mar y los del vómito negro, sin un brazo bienhechor a donde volver la mirada... me parece hasta criminal, señor Juan.

SR. JUAN.— ¿Y qué–y vamus facer… él más que naide lu desea y hasta lu pide… sus sueños de contino, son marchar lexos d’aquí, pa la Bana, y en so entosiasmo y delirio, dizme que non m’aflixa, pos él sabrá con so trabayu honráu, tascar el xugo qu’así m’ayunta a la voluntá del siñor Conde.

(... / ...)