GARCÍA RENDUELES, Enrique

(1880–1955)

Nació en Xixón en 1880 y morrió na mesma ciudá en 1955. Estudia’l bachilleratu colos xesuítes nel Colexu la Inmaculada y ingresa darréu nos Seminarios de Valdediós y Uviéu, ciudá na que se va ordenar sacerdote en 1903. Dende 1921 exerce como profesor de Relixón nel Institutu Xovellanos de Xixón. Ye autor de dellos trabayos d’investigación sobre la figura de Xovellanos y otros temes asturianos. Poeta n’asturiano, publica en 1925 l’antoloxía Los Nuevos Bablistas, que recueye obres d’autores del sieglu XIX como Caveda y Acebal y del XX, contemporanios del propiu Rendueles (él mesmu apaez con una amplia amuesa de la so poesía). Trátase de l’antoloxía más importante depués de la de Caveda de 1839 y de la de Fermín Canellad de 1887. Reimprimióse n’edición facsimilar en 1987, nun volume a cargu d’Álvaro Ruíz de la Peña.

García Rendueles fue miembru del IDEA.

BIBLIOGRAFÍA

Edición lliteraria

García Rendueles, Enrique

Los nuevos bablistas / Enrique García Rendueles; edición d’Alvaro Ruíz de la Peña— Uviéu : Academia de la Llingua, 1987. — Ed. facs. — 359 p. — (Llibrería facsimilar; 2)

ISBN 84-680-1.462-8

Bibliografía

Vicente García Oliva, Vicente, Aventura humana y lliteraria al rodiu de Don Enrique García Rendueles, Uviéu, Conseyería d'Educación, 1992.