LORENCES, Taresa

(1955)

Nació Taresa Fernández Lorences en Cueva, conceyu de Salas, en 1955. Poeta tardía, diose a conocer con El son de los picaportes, llibru col qu’algamó’l Premiu Fernán Coronas de poesía nel añu 1994. Ye miembra de la organización radical d’izquierdes Lliberación y una de les militantes más actives de la Xunta pola Defensa de la Llingua n’Uviéu. En 1995 fue una de les integrantes de la comisión que la Xunta unvió a entrevistase col príncipe Felipe de Borbón.

La poesía de Taresa Lorences parte d’ún de los temes más recurrentes na lliteratura asturiana de tolos tiempos: el sentimientu de la tierra, pa espresar en versos senciellos, escritos nel so dialectu natal del Occidente, la impresión de desarraigu d’una muyer adulta y urbana respective a la so infancia solitaria y campesina. El paisaxe de l’alcordanza perdíu nel pasáu y el que pervive nel presente estrizáu pol pasu del tiempu, son dos de los elementos sobre los que transita la poética d’esta autora.

BIBLIOGRAFÍA

Creación

Fernández Lorences, Taresa

El son de los picaportes / Taresa Lorences. — Uviéu : Trabe, 1994. — 53 p. — (La fonte de Fascura ; 10). — Premiu “Fernán Coronas” 1994.

ISBN 84–8053–038–3

Ensayu

Conceyu de Salas. — Uviéu : Academia de la Llingua Asturiana, 1992. — p. : map. ; 21 cm. -- (Toponimia ; 5)

ISBN 84-86936-31-4 v. 2

Bibliografía

Xosé Bolado, “Pontes llevadices de la memoria”. En: Lliteratura, VIII, 1995, pp.32–35.

ANTOLOXÍA

YA inútil querer atopar

la calor de las túas manos

nos picaportes.

Tán axelaos

desque te fuste

yá nun hai quien abra las puertas.

VOLVO toles tardes a la vera’l molín.

Al ponese’l sol, cruzo la ponte.

Yá nun hai camín, ya nun hai camín,

asonsaña la fonte.

A LA ESCONTRA

Naide sospecha ónde ta

el miou cementeriu particular.

Una mesa, un papel, una pluma

ya salgo escontra ti.

Chocante relixón

pa daquién que se diz atea.

CUÁNTA TIERRA

¡Cuánta, cuánta tierra!

precisamos entrambos.

Tú pa descansar,

yo p’anubrir la pena.

(El son de los picaportes)