MARCOS DEL TORNIELLO
(Xosé Manuel García González)
1853-1938)
Alcuñu lliterariu de
Xosé Manuel García González. Esiste cierta confusión sobre’l verdaderu nome de Marcos
del Torniello; asina na mayor parte de la bibliografía esistente sobre l’autor
avilesín caltiénse que’l so nome real yera’l de José Benigno. La cuestión
acláriala Antón García na edición de la Obra
asturiana de Marcos del Torniello: un tracamundiu acontecíu na so época
d’escolín fai a José Manuel adopar el nome de so padre: Benigno. Antón García
tamién aclaria que’l llugar de nacencia de Marcos del
Torniello ye Gozón y
non Avilés, como siempre s’afirmó. Nació en 1853. Estudió na Escuela d’Artes y
Oficios d’Avilés y bachilleratu n’Uviéu; matricúlase en Derechu na Universidá,
anque nun llega a acabar la carrera. Dende entós dedícase a exercer la
enseñanza en dellos centros docentes.
Colaborador habitual d’abondes
publicaciones periódiques y fundador d’otres, la so popularidá va veni-y de la
so obra escrita en llingua asturiana. Tambor
y gaita (1904) ye’l so primer llibru; impresu col apoyu económicu de la
Diputación ye un conxuntu de versos de calter costumista y humorístico, na
llinia trazada décades atrás por Teodoro Cuesta. A esti llibru síguenlu La
esfoyeta, imprentada en Madrid en 1906 y Colasón de Patagorda ó ¿En qué falto yo a daquián?, publicáu
n’Avilés en 1918, dos breves pieces teatrales tamién de calter costumista. Nel
añu 1925 da a estampa Orbayos de la
quintana, quiciabes la so obra más conocida, con prólogu d’Armando Palacio
Valdés y portada del pintor Paulino Vicente; el novelista asturianu empobinara
tiempu atrás una campaña de suscripción popular pa sufragar la publicación
d’esti llibru.
Autor d’una amplia nomadía ente los
escritores n’asturiano d’esti sieglu y paradigma per munchu tiempu del
“bablista” por escelencia, la so obra nun paez tener avieyao cola mesma dignidá
que la d’otros contemporanios suyos.
Collaborador de la prensa asturiana y
americana, la so obra más popular ye, ensin dulda, la lletra de la famosa
habanera "Soi de Verdiciu".
Falleció n’Avilés nel añu 1938. La
Conseyería de Cultura del Principáu dedicó-y nel añu 1996 la Selmana de les
Lletres; con esi motivu publicóse’l primer tomu de la so Obra asturiana n’edición a cargu d’Antón García.
BIBLIOGRAFÍA
Creación
Marcos del Torniello
Tambor y gaita : poesías en dialecto asturiano
/ José Benigno García (Marcos del Torniello). — [S.l.] : [s.n.],
1904 (Oviedo: Escuela Tipográfica del Hospicio Provincial. — XIX,
206 p. ; 21 cm
Marcos del Torniello
Colasón de Patagorda o En qué falto yo a
daquién. — Avilés : Imp. La Esperanza, 1918. — 14 p. ; 22 cm
Marcos del Torniello
Orbayos de la
quintana : (poesías en dialecto asturiano) / José Benigno García (Marcos del
Torniello) ; carta prólogo de Armando Palacio Valdés ; epílogo de Alfredo
García Sánchez. — Madrid
: [s.n.], 1925. — 327
p. ; 19 cm
Marcos del Torniello
Orbayos de la Quintana : poesías en dialecto asturiano
/ Xosé Benigno García González (Marcos del Torniello) ; pról., Armando Palacio
Valdés. — [Ed. facs.]. — Gijón : Mases, 1985. — 327 p. ; 18 cm. — (Clásicos
Populares Asturianos ; 2). — Reprod. facs. de la ed. de: Madrid : Imp.
Helénica, 1925.
ISBN84–86328–22–5
Marcos del Torniello
Obra asturiana / Marcos del Torniello ; prólogu
d'Antón García. — Uviéu : Trabe, 1996. — 544 p. ; 22 cm.
ISBN
84-8053-057-X
Bibliografía
Carmen Díaz Castañón, “José Benigno García”. En:Literatura asturiana en bable, Salinas,
Ayalga, 1976. Pax. 111-117.
Antón García, “Introducción” a:Marcos del
Torniello,Obra Asturiana, T.I.,
Uviéu, Trabe, 1996, pp. 11–15.
José María Malgor, Marcos del Torniello, poeta avilesino : (guión, notas, apuntes y datos
para una biografía) : discurso leído... el día 26 de abril de 1950 por José
María Malgor; contestación de Fausto Vigil Álvarez, Oviedo, Instituto de
Estudios Asturianos, 1950.