SANTORI VÁZQUEZ-AZPIRI, Xuan

(1968)

Nacíu n'Uviéu en 1968, Xuan Santori ye ún de los autores mozos que más prometen la lliteratura asturiana d'anguañu. En 1999 ganól Premiu Tiadoro Cuesta col llibru Los inconvenientes de la especie. Publicaos tien ya dos obres, una de poesía (Zunes) y la traducción de Poesía épica anglosaxona. Los poemes que d'esti autor conocemos dexen acolumbrar el maxisteriu de poetes como Víctor Botas, Miguel D'Ors o Ángel González, nos que un curiáu prosaísmu quier tapecer la fonda carga de sentimentalidá qu'arrecostinen nos sos versos.

BIBLIOGRAFÍA

Santori Vázquez-Azpiri, Xuan

Zunes / Xuan Santori Vázquez-Azpiri. — Uviéu : Academia de la Llingua Asturiana, 1998. — 46 p. ; 20 cm. — (Llibrería académica ; 28)

ISBN 84-8168-140-7

ANTOLOXÍA

XEITU

Vaya un xeitu de vida,

que llevo, mira tu

tolo que tengo esprecetao

contra caduna de les familiares

zunes, y güei que marcho

coles camises, les ilusiones

y petites plegaos bien curiosinos

na maleta

llega esti puñeteru

abril a despedise

ximielgándome impúdicu

bien delantre los güeyos

tola vida que ye a güañar

en cada fueya y en cada

freba y /seguramente

de rebisgu)

a meteme en fatu

un bon tanto

d'inconveniente y puñona

señaldá.