SERRANO FERNÁNDEZ, José Horacio

(1955)

Nació en Candás en 1955. Llicenciáu en Filoloxía Hispánica pola Universidá d’Uviéu y profesor de Llingua y Lliteratura españoles nun Institutu. Dase a conocer cola novela Como tu quieras (1991), qu’algama’l XI Premiu Xosefa Xovellanos. Trátase d’una particular reflesión sobre’l pasu de tiempu, los avatares de la vida y los desengaños de la esperiencia, nel relatu xeneracional d’un personaxe protagonista que coincide abondo en bagaxe esistencial y rasgos colos del autor. En 1993 José Horacio Serrano publicó una nueva obra narrativa, nesti casu, empobinada al públicu infantil y xuvenil col títulu: Cuentos pa facer sopes.

BIBLIOGRAFÍA

Creación

Serrano, José Horacio

Como tú quieras / José Horacio Serrano. — Uviéu : Conseyería d’Educación, 1991. — 167 p. ; 22 cm. — 11 Premiu Xosefa Xovellanos.

ISBN 84-7847-050-6

Serrano, José Horacio

Cuentos pa facer sopes / José Horacio Serrano ; dibuxos de Gaspar Meana. — Uviéu : Trabe, 1993. — 71 p. : il. ; 19 cm. — (Montesín ; 4).

ISBN 84-8053-026-X

ANTOLOXÍA

PA DIR FACIENDO BOCA

Yera enforma difícil maxinar que les coses ocurrieren talu como lo ficieron durante los últimos quince o vente años de la mio vida y, sin embargo, cuando adobo col recuerdu la rede les llaceries sufríes delantre un vasu vino y delantre la mirada los amigos de siempre, saco en resultancia el tar simplemente cuntándo–yos coses normales y corrientes, d’eses tan bobes que puedes alcontrar en cualquier serial hispanoamericanu, coses hasta ciertu puntu lóxiques, coses del pingón.

Siéntome tristayu, o meyor, ablayáu; y nestos folios qu’agora escomiencen a mover les patines tengo la sana intención de nun facer una descripción al milímetru, como pasa colos proyectos industriales, de los mios avatares; de nun facer una enumeración cronolóxicu–sentimental de les mios penalidaes sucesives, uni–doli–teli–catoli, que nun fueron tantes, de nun facer un analís filosóficu , sé que lo v oi facer magar seya de mou simpl ayu, amater, un analís críticu o etnolóxicu de la mio totalidá, si ye qu’alguién me dio esi don; tengo la sana intención de desfogame y char lloñe, onde pueda velu, nel foliu más blancu, ñidiu y puru qu’atope nesti cuartu atacáu de notes coles prieses del mio cálter, l’allorie que de toos me correspuende.

Dicía enantes que nun deseyaba seguir al pie d’un tiempu marcáu por unes aguyes cachos de fierro ensin xuiciu propiu..., y si non dígolo agora, esti discursu qu’escomencipia; y ello trespórtame en pendolinos al entamu, a los años nos qu’estudiábamos una carrera, ¡tien carrera!, y dalgunos ente nosotros lluchábamos, antroxábamos, folixábamos, escontra daqué ya perdío, escontra daqué esbarioso que dexó en muncha xente un tastu amarguxu de suañu y de presente.

De siempre, na facultá, nel sofá, na siella distinguida del profesor actual, tuve rabia d’esos escritores de vida sosa y vacía d’experiencies destacaes, no coment, cola sola salida a la so charranería de cuntar anécdotes pequeñines, fates, sinsustancia, y darréu, con esi corchu fofu, destaponar una botella enllena de milenta pensamientos murnios y gayoleros; pero nun me queda más remediu qu’aparar la saboneta estrapayándola na parede verdadera y camentar, cola mandrecha baxo la barba, que los seres humanos namás nos enfrentamos xuntos contra algo, namás facemos comuña contra nada: dame un abrazu, tas llorando, nun montes espolines, quiérote, algamemos un rebañu; un rebañu, y riste, pero’l cabezaleru ta mirándonos, marcha, nun hai rebañu, l’enemigu dexónos solos lladrando, bramando, metanes el monte a los que tamos condergaos a ser ganáu. En fin, esa reflexión puedo facela notros apartaos d’esta hestoria, y voi dexala pa prau, pa otru prau. E1 casu ye que manifestase terminó siendo un actu eróticu pa la gran masa mientres los ensin borrón, los escoyíos, atalantábamos que lo meyor del nuestru llabor yeren los momentos previos, les conceyos clandestinos nel pisu Susana, ella negábase en reondu, nones, p’acabar aceptando, santotomasunainomás, por última y definitiva vez hasta la próxima, y la próxima asocedió de sutrucu una tarde fría, calentinos, fuera xebatiaba si dios, y alboreció la lluz castigadora d’una madre, cola gadaña l’honor arrecostines, vais quedar bien escarmaos, la de Susana, que pensaba alcontrar a lo so fía, ¡la mio fía! —glayaba cuando la escorribanda— estudiando y atopó una cuadrilla aspirantes a revolucionarios de traces sospechoses, ¡con estos xostrones!, de barbes antihixéniques sabor café y coñá malo, y llueu, arrexuntaes les tropes espardíes, nel reserváu del putu café hasta que tamién, como pa creyenos importantes, alcontráronnos de mala espina, ya vos voi filiando dicía l’amu, y calaron les nuestres melotes madures col cuchiellu la puta calle qu’aquí nun queremos xareos. Los más pacíficos del barriu. Depués, ya nun tenía xacíu facer andeches nin que riscase l’alba les intenciones polo que, una vez atracáu’l misteriu nel tabal de la hestoria, esi misteriu abultáu col formientu la xuventú y tamién, ye de suponer, la seguranza de qu’enxamás diba pasanos daqué demasiao grave, lo que más morbu tenía yeren los alderiques, siempre iguales, clónicos, siempre coles mesmes expresiones estudiaes, colos mesmos insultos, y colos mesmos resultaos postreros...

—Alguién tien que subir hasta Ciencies.

—¡Esos nunca fain nada!.

—¡...atechaos de los coyones!.

—Pero ya sabes que nun ye igual una güelga con Ciencies que sin ellos..

—Son unos faches, monxones

—...

Y, de seguíu, colabes del pisu la probe Susana, en realidá había munchos pisos pero ella agospiaba la lacena y bodega meyor forníes, chapó por so madre, la que nos echó a pataes, ¡qué poco duró l’inventu!, salíes a la calle cola satisfacción del deber cumplíu:

—¿Quiés un pitín?

—Bueno.

Silenciu, el ruíu d’un mecheru, unos pasos que se pierden nun portal, ta prugando, suavino, paez que non pero mueya y, cara y cruz d’un destín absurdu, l’aliendu tebiu de los triunfadores:

—¿Qué tas camentando?, tuviste mui calláu tola nueche, ¿saldrá bien?

—¿Y yo qué sé. Como siempre, supongo.

—Faló don óptimu y dixo má, ¡yes la hostia!

—Si quies engañámonos, y si non, puedes mirar p’atrás.

—¡Déxame d’hosties que nun tamos en clase!

Pero los gueyos de Manolo rellumaben cola mesma conocencia que los míos. A les güelgues, a les manifestaciones, a los actos públicos y privaos, acaben diendo los mesmos, los de siempre; llevaron a dos pal cuartón, hai que glayar estes conseñes, tocáronme tres toletazos, nada. Los güeyos de Manolo y los míos sabíen por vieyosmasquevieyosyaenprimerucarrera qu’aquellos glayíos d’estudiantes, esos son los que nun dan golpe, enxamás diben cambiar la “so” forma gobernanos, pero nun yeren pa imaxinar les coses del mou qu’ocurrieron.

Si daquella–y digo a Manolo, nun me doi ringorrangu ni presumo d’aldovín —nun–y lo dixe porque nun lo sabía—, que l’éxitu de la nuestra causa taba encolingáu nel buxu gabitu d’una muerte escura nun hospital, de xuru que me llama ¡acoyonáu, renegáu!, de xuru qu’aventa’l pitu con rabia y escapa chando babes y maldiciones hacia’l probe de mi; y si–y digo, amás d’eso, que les coses nun van a cambiar Manolo nun van a cambiar porque vamos siguir teniendo cásique los mesmos perros con cásique los mesmos collares, toos esos proyectos, suaños que tienes–tenemos de solidaridá —entamaba de memoria cola retafila—, comuña, llibertá, andeches, xusticia, xunión, humanidá, hasta que se m’enllenaba la boca y, so, aparaba’l carru la llista imposible, van siguir mirándonos y apurriéndonos la mano —porque tamién ellos son inocentes, je, je, como nosotros—, suplicante dende la rexa l’enchipamientu, homes al fin, y l’ambición. Si yo–y digo eso, pégame, de xuru que me pega coles ganes y non colos puños zarraos y la mente en blanco; pero nun fui a deci–ylo porque nin yo lo sabía nin me valía gota sabelo, nin fuere quien a deci–ylo naquel entós de magar sabelo.

—Dalgún día van entamar los cambios sociales, Manolo, va cambiar esto; y esi día puede que seya mañana, un mañana.

Porque sabía que la última calada trai siempre al llombu la saca col carbón de Reis, el carbón prieto y dulzayo, lo bueno y lo malo, l’ún y l’otru, y yo fíce–y un guiñu esa nueche a lo bueno: tiré pela caleya’l mediu. Porque sabía que la última calada ye como’l deseyu gule de los condergaos a la pena muerte —aquí nun hai lámpares maravioses nin magos—; ye la calada los inocentes, la calada los pininos.

(... / ...)

(De Como tú quieras)