SOLAR SANTURIO, Andrés

(1955–1984)

Nació nel Fondón de Deva, en Xixón nel añu 1955. Fíu de campesinos, fexo los estudios primarios na escuela del so llugar natal. Depués dedicóse a trabayar na casería familiar. En 1978 entró en contactu colos cantautores Xulio Ramos y Carlos Rubiera. Per mediu d’éstos entra en Conceyu Bable y empieza a publicar artículos na sección qu’esta asociación caltenía nel diariu El Comercio baxo’l nome de Alitar Asturies. En 1979 algama’l Premiu de Cuentos Curtios del Institutu Jerónimo González de Sama, Llangréu, col relatu "En chigre". Al añu viniente vuelve a obtener el mesmu gallardón con un cuentu tituláu "Toni". Van ser los empiezos d’un curtia, pero intensa carrera, enllena de premios lliterarios: II Concursu de Narraciones Curties de la Diputación (ex aequo con Miguel Solís Santos) col relatu "Xuan y Xuanín", Concursu de Cuentos Curtios de Conceyu Bable en 1983 cola narración "El milagru de la vara’l patriarca", y el Primer Concursu de Cuentos Conceyu de Llanera, col relatu "En cuartu de siempre", ente otros.

En 1981 la comisión empobinadora de l’Academia de la Llingua escuéyelu como Miembru Correspondiente. Dos años depués, Andres Solar refuga la propuesta de que lu nomen académicu de Númberu, alegando tar “pocu estudiáu” pal desempeñu del cargu.

Xunta’l so amigu Carlos Rubiera imparte clases de llingua asturiana na Universidá Popular de Xixón a lo llargo del primer trimestre de 1983.

Publica abondes narraciones y poemes na revista de l’Academia Lletres asturianes.

Les sos últimes actividaes públiques van tar centraes nel mundu del teatru, al través del grupu Xaréu, entamáu col cantante y actor Xulio Ramos. Con esti grupu va facer dellos montaxes dedicaos tanto al públicu infantil como adultu.

Andrés Solar morrió nun accidente de circulación en 1984.

La narrativa d’Andrés Solar xira casi toa alrodiu del mundu de la infancia y la mocedá nun mediu rural que puxa col urbanu, pero como diz el críticu Xosé Bolado: “nél la presencia de lo rural nun ye bucolismu nin continuación de la mena ruraliega sentimental (...) alita nos sos cuentos l’ánima d’un panteísmu que fai del home un ser en perfecta relación col so arrodiu. Tampocu hai mieu a mostrar los aspectos xabaces que la hestoria fo texendo ya calteniendo dende cuantayá neses fasteres de la sociedá asturiana”. A xuiciu de Bolado esta actitú pa colo rural y el mundu de la naturaleza “sepártalu nidiamente d’aquellos escritores, xeneralmente urbanos, que describen l’aldea dende la so fantasía ciudadana”.

En 1990 l’Asociación d’Escritores Asturianos publicó Un homenaxe póstumu a esti autor, tráxicamente fináu cuando inda nun cumpliere los trenta años.

BIBLIOGRAFÍA

Creación

Solís Santos, Miguel

L’oxetu la carida / Miguel Solís Santos. Xuan y Xuanín / Andrés Solar. — Uviéu : [s.n.], 1981. — 57 p. : il. ; 21 cm

ISBN 84-300-7831-0

Solar, Andrés

Obres inédites / Andrés Solar ; aviaes y anotaes por C. Rubiera y R. d’Andrés. — Uviéu : Academia de la Llingua Asturiana, 1986. — 329 p. : il ; 20 cm. – (Llibrería académica ; 5)

ISBN 84-600-4382-2

Bibliografía

Andres Solar un homenaxe, [s.l.], Asociación de Escritores Asturianos, 1990.

Xosé Bolado, “Andrés Solar: la seducción prometeica”. En: Lletres asturianes, XXVIII, 1988, pp. 17–22.