TREJO FOMBELLA, Helena

Nació en Sama, Llangréu. Residió en Cataluña dellos años. A la vuelta participa como alumna nun cursu d’asturiano de la Universidá Popular de Xixón impartíu por Carlos Rubiera y entra en contactu col mundu del asturianismu. Empieza a escribir poemes na nuestra llingua; dellos van ver la lluz na sección Alitar Asturies d'El Comercio, otros na revista de l’Academia la Llingua Lletres asturianes. En 1989 da a estampa’l so primer llibru: Camientos, coses, curuxes, un conxuntu de poemes escritos tiempu atrás nos que l’autora amuesa los sos esmolecimientos por Asturies, la so propia esistencia o la realidá social que l’arrodia. Algama dellos premios lliterarios como’l Premiu de Poesía de L’Entregu en 1991 y el Concursu de Torna de l’Academia la Llingua cola so versión de El caminante y la muria de Salvador Espriu en 1995. Nel añu 1997 publica’l so segundu llibru de poemes: Nalón, nel que prosigue temes y formes del so llibru anterior, anque nesta ocasión col so llugar natal llangreanu de fondo.

BIBLIOGRAFÍA

Creación

Trejo Fombella, Helena

Camientos, coses, curuxes /Helena Trejo Fombella ; antoxana, Carlos Rubiera — Xixón : [l’autora], 1989. — 51 p. ; 21 cm.

D.L. AS–685–89

La patria de la piel : Muestra de poesía amorosa / Xulio Vixil, Helena Trejo, Mariano Suárez... (et al.). — Avilés : Asociación d’Escritores Asturianos, 1993. — 56 p. ; 17 cm. — (Toles voces)

ISBN 84-604-6686-8

Trejo Fombella, Helena

Nalón : poemes / Helena Trejo Fombella. — Uviéu : AYDA, 1997. — 61 p. ; 21 cm

ISBN 84-921686-4-1

Traducción

Espriu, Salvador

El caminante y la muria / Salvador Espriu ; torna d’Helena Trejo Fombella. —Uviéu : Academia de la Llingua Asturiana, 1995. —(Llibrería académica ; 27)

ANTOLOXÍA

Amorosiegu

Arrecendía’l to cuerpu, enllenu de bayura,

ya l’empar, dientru min, apurriábesme la vida.

Agora, cabu la mar sele y verdi,

n’alcordanza’l to afalagu

voi plumiando suaños enriba’l sable mariellu.

Xixón, branu, 1992

EnsIn tÍtulu

Tol llargor los nuesos cuerpos

arrecendía d’arumes amorosiegos;

enriba la yerba llandia y verdi

fundíamosnos dafechu, seliquino,

enllenos de bayura dichosa.

Xixón, branu, 1992

EnsIn tÍtulu

Nortiábamos a la gueta l’abellugu

onde’l sexu tornárase llume y vida;

darréu, los nuesos escatafinos afitáronse ellí,

talo raigaños encesos, biltrando traviés la tierra.

Xixón, branu, 1992

(De La Patria de la Piel)