SÁNCHEZ VICENTE, Rubén

(1951)

 

Nació en Xixón nel añu 1951. Hermanu del políticu asturianista y escritor Xuan Xosé Sánchez Vicente. Ye autor de dos llibros de monólogos publicaos nel entamu lliterariu del Surdimientu: Nuevos monólogos (1981) y Más monólogos atómicos y Fideblás (1984), lluego recoyíos xunta nueves pieces nel volume Monólogos (1999). Con estes composiciones de calter satíricu y humorísticu, Rubén Sánchez Vicente fai por rescatar un xéneru de gran cultivu en tola lliteratura asturiana tradicional y que nos años anteriores al Surdimientu sufriera un gran deterioru y desprestixu tanto no temático como no formal. En palabres del so hermanu, el Xuan Xosé críticu lliterariu, la obra de Rubén: “significa la renovación absoluta de la temática del monólogu” y el autor llogra “un estimabilísimu modelu humorísticu que rompe los marcos del más tradicional de los xéneros pa inxertalu nel Surdimientu con toa dignidá”.

 

 

 

 

BIBLIOGRAFÍA

 

Creación

 

Sánchez Vicente, Rubén

Más monólogos atómicos ; y Fideblás: (canciu epicu-cómicu) / Rubén Sánchez Vicente ; entamu de Xuan Xosé Sánchez Vicente. — Xixón : [l’autor], 1984. — 46 p. ; 21 cm

DL O. 1435-1984

 

Sánchez Vicente, Rubén

Nuevos monólogos / Rubén Sánchez Vicente. — Xixón : [l’autor], 1981. — 39 p. : il. ; 21 cm

ISBN 84-300-4920-7

 

Sánchez Vicente, Rubén

Monólogos / Rubén Sánchez Vicente. — Uviéu : Trabe, 1999. — 189 p. ; 17 cm. — (La risión ; 1)

ISBN 84-8053-116-9

 

 

Bibliografía

 

Xuan Xosé Sánchez Vicente, Crónica del Surdimientu, Oviedo, Barnabooth, 1991, p. 68.

 

 

 

 

ANTOLOXÍA

 

HOMENAXE A TIADORU CUESTA

 

¿Qué cosa cosadiella ye una cosa

(y non ye cosadiella revesosa)

que, tal paez que ye cara paisano,

y solo fema lo tien siempre a mano?

Tien barba, cual si fuere home de lleis,

y boca tien, que fae callar los reis,

y, en siendo boca de poques parrafaes,

ye tan bien fecha que llabios tien a pares.

Tien naricina, pequeña respingona,

non ye nariz corriente de persona,

yo enantes bien diría que asemeya

del frutu la zerezal la pepitiella.

Tan sólo nuna cosa non ye espeyu,

y ye que tien, la probe, solu un güeyu;

mas ye un güeyu galán, güeyu farrucu,

ye el güeyu de los güeyos más argutu,

pues si cierra esi güeyu munchu tiempu,

ye funeral seguru el seguimientu.

Tamién paez cavierna, aonde el pirata

de la pata de palu se aperecata

que puede dexar dientru el so tesoru

sin mieu que aconteza dengún robu.

Pero, aún siendo la cueva tan segura,

ye tanta del pirata la gafura,

y tan acostumbráu ta a los desmanes,

que dexa siempre a la puerta dos guardianes;

tan llaboriosos, tan bonos vixilantes,

que non los hai nel mundiu semeyantes,

porque, tando ellos dos puestos na entrá,

ye como tar la cueva taponá.

Non ye frutu de mar nin de montaña,

pos en toos llugares se lu apaña;

mas ye frutu necesariu pa la vida,

más que la carne, el aire o la bebida.

Pesia que tenga nomes a montones,

ya mal mirao nomalu nes reuniones,

y, sobre tou, tando nel conceyu,

daqué muyer, obispu, guaxe o vieyu.

¿Fae falta que vos diga aún más señes?

Ye cosa perquerida de les neñes;

mas siendo cosa que les llena de alborozos,

ya más quería entovía pelos mozos.

Ni pa unos ni pa otros ta a la vista,

mas ye cosa normal pasá–y revista,

y pue decise que si falta el reglamentu

produzse, equí nel mundu, un hinchamientu.

Solo vos digo que ye cosa tan vieya

(y ta ñidiu que ye cosa cosadiella)

que voi dicivos que no hai ningún retoñu

que ñazca sin pasar antes pel...

—¡Abasta! ¡Ya lo tengo! dixo un mozu,

tirando la montera de alborozu.

—Pos, entós, siento dicite, Pachín míu,

que, si lu tienes tú, tas confundíu.

 

               (De Monólogos atómicos)